نزلت الشارع واستنيت.

لقيت من بعيد كل شيء متغير.

افتكرت نفسي وأنا عيلة،

بلعب هنا وهناك،

قصاد بيت جدتي،

في الحتة إياها.

وفجأة لقيت كله سراب.

لا الأرض هي الأرض،

ولا جدتي هناك،

ولا أنا بلعب،

ولا أي شيء زي ما كان.

مجرد إنسانة ماشية،

بتتأمل في الملكوت،

وتفتكر وتفكر.

وفجأة، وفي وسط الزحام،

عدى قدامي…

وسمعت الزمارة إياها.

زمارة بياع غزل البنات.

لقيت الزمن اللي فات،

اللي بدور عليه،

معلم على وشه.

ولقيت البراءة اللي اختفت مني،

موجودة في الكيس الأبيض والبمبي.

وفجأة لقيت الأذان عالي،

بيهز العالم من حواليا.

بيفكرني برب العالمين.

وافتكرت ناس تانيين،

راحوا وسابونا تايهين.

معلموناش نتعامل إزاي مع الشرور.

كل طموحهم،

لقمة هنية،

وهدمة حلوة،

تمام زي بياع غزل البنات.

وافتكرت نفسي وأنا عيلة.

ولقيتني هناك،

عند شارع الذكريات،

وحواليا كل العيال.

نفك الخيط بتاعها،

عشان تطير لفوق،

بعيد،

وترفرف هي وأحلامنا…